📰📲呢篇新聞相信能夠以客觀數據反映出現時中小企營商環境嘅轉變。
『……政府透過按揭保險公司提供「中小企融資擔保計劃」（下稱「中小企擔保」）下的八成及九成信貸擔保產品，資產質素亦明顯轉差。按保公司回覆本報稱，去年底兩項產品的累計壞賬率分別增至4.09%及1.76%，後者是九成信貸產品推出4年多以來的歷史高位。2022年底兩項比率為3.82%及0.74%。』
政府八成擔保計劃由實施至今12年，累計壞帳4.09%。
至於九成擔保計劃由2019年實施至2022年3間年累計壞帳0.74%，但喺2023年卻大升至1.76%，一年內嘅增幅超過三年累積總數。
以上嘅數據可以觀察到幾點：
1. 八成擔保計劃壞帳增幅少而且穩定
我哋嘅理解係可能由於八成擔保計劃本身申請門檻較高，可以獲得八成擔保計劃嘅企業本身規模、資產實力同現金流都比較強，呢類公司一般比較少壞帳。
2. 唔少中小企疫情期間生意其實很正常
2020-2022年無外遊令本地消費強勁，反而係2023年開關後營運變得艱難。零售、飲食呢類消費終端需求一旦下跌，就連帶批發、貿易、物流業需求一同減少。加上樓市下跌，少咗人買樓，建築、工程、設計裝修、傢私業需求都減少，壞帳升高亦完全不意外。
3. 九成擔保計劃屬於入門級中小企貸款
九成擔保計劃對企業年資同營運實力嘅要求相對較低，較細嘅企業可以受惠，但同時壞帳風險亦因而較高。然而，由於銀行有完整制度去審核借貸人營運背景，唔會輕易批出貸款，所以即使壞帳率有所提升，相信收取嘅利息足以完全抵消壞帳。
上述數據亦衍生一個問題－－「咁銀行會唔會因為壞帳率升高而難批貸款❓」
邏輯上，銀行當然會調整貸款策略對應對壞帳率提升，問題只係有關壞帳係咪已經Bad Enough 令銀行Alert。
數據上，只要參考各大銀行嘅審計報告，就會發現2023年整體中小企放貸已經比2022年有所縮減。
就我哋過去一年觀察所得，有銀行的確因為壞帳個案，尤其是大額壞帳，去調整貸款策略，包括提升審核範圍(要睇嘅文件多咗)、增加額外審核條件(要符合更多條件)、減少貸款額等，有D個案甚至要有銀行高層願意孭飛(endorse) 先可以獲批，亦有銀行收起咗成個中小企貸款部門唔再積極借貸。
當然，現時亦唔係間間銀行都咁保守，仍然有銀行一切如常，按正常程序批核，但相對過往係銀行求中小企借錢，現時調轉咗係中小企求銀行批錢，生態的確大有不同。
註：
以上內容由©MC Advisors原創，切勿抄襲及轉載。
🙇🏻♂️ 相關資訊謹屬個人意見，如有錯漏，敬請包涵。
