1. 有BR(商業登記證)就可以向銀行貸款？
唔可以。
任何人都可以申請商業登記證，但銀行只會向有實質業務及營運嘅公司借出貸款，無實際經營或者只係有限度經營嘅公司都不符合銀行貸款的申請門檻。
舉個例，A先生正職係某公司銷售經理，登記咗一間公司喺網上賣飾物，由於呢間公司只係A先生副業，即使算係有實際經營，但因為營業額細，所以都不符合資格。
2. 獨資公司(無限公司)可唔可以貸款?
可以。
無論獨資、合夥定係有限公司都可以向銀行貸款。好多傳統行業嘅中小企都係獨資公司，呢方面係唔影響貸款㗎。
3. 有限公司屬於有限責任，公司貸款後倒閉，老闆係咪唔要需要負責任？
當然唔係。
即使係政府擔保貸款，都需要公司老闆簽名做擔保人。
如果公司倒閉，銀行會向擔保人(老闆)追債，如果老闆無力償還而破產，銀行先至會向政府Claim錢。
4. 剛剛開公司可唔可以貸款？
唔可以。
銀行中小企商業貸款對於公司營運年期有要求，一般最少營運1年以上，部份銀行要求3年以上。
試諗下一間啱啱成立嘅公司根基都未打穩，銀行又點會冒險借錢出去呢？
5. 銀行對公司盈利有冇要求？
就中小企貸款嚟講，多數銀行對於盈利要求其實唔算好高，即使公司生意有虧損，銀行都唔一定唔批。
但當然嚴重虧損或者連續多年虧損都會影響銀行批核，至於公司有些少盈利，對於批核貸款會有一定幫助。
6. 公司無做審計報告可以申請貸款嗎？
其實唔係所有銀行都需要睇審計報告，所以假如你公司遲咗做審計，甚至乎公司因為太新而未有審計報告，都仍然有可能做到貸款，不過就要搵啱銀行去做。如果某銀行需要睇審計報告批核而你又提供唔到，申請就唔會成功。
7. 個人信貸評級會影響公司貸款嗎？
絕對會。
雖然係公司貸款，但由於老闆都要做擔保人，所以銀行都會查閱老闆嘅信貸報告，睇睇評級同信貸記錄再決定借定唔借。
所以如果信貸評級唔好，記得盡量養返靚先至做申請。
8. 公司行業會影響公司貸款嗎？
會。
唔同行業嘅信貸風險唔一樣，某D行業被銀行定義為高風險行業，就好難向銀行借貸，例如娛樂事業(酒吧、夜總會)。
另一個例子就係行業現況或前景不佳，例如餐飲業，雖然仍然可以貸款，但貸款難度會較高。
9. 曾經破產能申請公司貸款嗎？
可以，但老闆喺破產後嘅記錄必須要良好。
10. 申請銀行公司貸款一般需時幾耐？
唔同銀行處理嘅速度會有唔同。
一般由申請到批核約2-4星期，再於成功批出後2星期左右放款。
需要咁長時間，係因為中小企貸款最少都要經三個部門去核對文件及批核，最後仲需要交畀政府審批同埋開公司戶口。
以往我哋都做過一啲case 四日就批出，然後再交俾政府批(約1星期)，不過呢種速度需要天時地利人和(個案簡單+文件齊全+銀行願意幫手)，所以都唔好預期每個case都可以咁快，都係預返2-4個星期比較穩妥。
註：
🙇🏻♂️ 以上資訊謹屬個人意見，如有缺失，敬請多多包涵。
Comments