【2025銀行中小企貸款隱憂】除咗難批，仲有咩要留意？

香港貸款環境日趨嚴峻

眾所周知，銀行從來都唔係開善堂。經濟唔好，落雨收遮係常見現象，今年亦不例外。中小企想同銀行借錢周轉，比起早兩年被拒批嘅機會大咗好多。咁除咗銀行批貸款難咗，申請期間仲會有咩突發情況或者隱憂出現？

1. 銀行到數潛規則影響進度

銀行每項產品每年都會有一個Target，而Target會每年調整（例如部份銀行因為貸款市道唔好而縮細Target）。前線未到數就會積極搵客，但係一旦到數，大家就會放軟手腳嚟做。

如果今年銀行條數跑突咗，下個年度管理層要加Target，條數就會更難跑，所以寧願慢慢做，做少啲，等來年Target細啲。呢個係大額商業貸款嘅常態。

如果年尾想借錢買貨，但唔好彩銀行條數或者銀行經理條數到咗，個申請就有機會「比較慢」，隨時新一年年頭先拎到錢，咁就會失去咗成個聖誕假期嘅黃金機會。

2. 人為因素難以預測

唔好以為銀行好制度化，其實銀行同各個行業一樣，涉及好多人為因素。雖然絕大部份做商業貸款嘅銀行職員一般都有最少幾年銀行經驗，但中小企仍然有機會因為以下情況令申請受阻：

例如職員即將轉工／已經到數唔駛跑／經驗不足／放大假等等數之不盡嘅人為因素，令成功率同批核速度難以確定。

3. 申請期間生意變化影響結果

唔少公司借錢都係因為周轉問題，而問題通常都來自被拖數／生意突然少咗。中小企貸款申請期動輒都需要一個月以上，所以就有機會申請時盤數過得到銀行，但申請期間生意未如理想。

銀行睇多兩眼，發覺唔對路，就有機會拒批。所以有時申請同批核速度係非常重要，一旦拖得耐咗，就有機會由原本好掂好得，變咗得個桔。

👀 總結：細節決定成敗

以上只係部份例子，實際上成個申請仲有好多細節會影響申請成敗同速度。大家記得要多加留意，提前做好準備，避免因為這些隱憂而影響貸款申請！

註：
🙇🏻‍♂️ 以上資訊謹屬個人意見，如有缺失，敬請多多包涵。