【原來你一直揀錯銀行？】香港中小企貸款要識揀「肯批嗰間」

銀行界收緊中小企貸款，呢個Topic 我哋都講咗超過一年，而且唔少客戶搵我哋幫手都係因為佢哋嘅銀行唔再批貸款俾佢。

不過近期出現咗一個奇怪現象，同一個市場、同一種貸款，A 銀行貸款條件收緊到爆，但B 銀行反而超級積極call客，貸款上限愈訂愈高。

到底發生咩事？

1. 點解有銀行越來越保守？

通常因為佢哋「爆過煲」，而家要收拾殘局。過去幾年，唔少行業經營困難，還款能力下降；遲還款、執笠，比比皆是。結果喺銀行手上嘅商業貸款壞帳率急升。壞帳一多，銀行就自然落閘、收緊、減額、拒批。

講白啲，呢啲銀行依家處於救火期，所以審批步步為營。

呢種情況之下，佢哋只做高質素客戶生意，因為佢哋嘅大方向係：「唔好再出事就得。」

2. 有銀行突然變得非常積極，點解？

你可能覺得奇怪：明明大環境咁辛苦，點解仲會有銀行積極放貸？甚至比以前更積極？

答案係：因為佢哋早兩年都爆過煲，而家已經重整完，要開始「反攻」市場。呢啲銀行曾經試過壞帳升到痴線，所以內部會改革洗牌，重整貸款策略，降低高風險客戶數量。

呢段緊縮期隨時持續兩三年，直至佢哋覺得可以重新出發。銀行唔會放任市佔率逐步流失，經歷咗洗牌，佢哋希望逐步追返市場份額。

換個角度睇就係之前唔敢借，而家市場份額俾人搶晒，急住要追返。呢種銀行會變得非常積極，審批速度加快，條件可能比較簡單，而且利率有競爭力。

呢段蜜月期未必會好長，但就係中小企可以好好加以利用嘅時期。

3. 兩種銀行同時存在，聰明嘅中小企應該點做？

如果你用同一套財務資料、同一個行業、同一個生意規模，去申請上述兩種唔同嘅銀行，結果會完全唔一樣。亦都代表當你申請一筆中小企貸款嘅時候，面對嘅唔單止係條件門檻上嘅問題，銀行內部策略亦好大程度會左右你嘅成敗。

坊間有好多銀行有做中小企貸款，你未必需要浪費時間喺收緊咗嘅銀行身上，如果你申請咗，但搞左好耐，銀行又唔講明拒絕，但亦都冇下文，咁你就明咩事，可以諗定下一步對策喇。

註：🙇🏻‍♂️以上資訊謹屬個人意見，如有缺失，敬請多多包涵。