中小企貸款常見錯誤：只搵同一間銀行借錢？

中小企重複申請貸款卻不獲批核

好多時我哋幫中小企睇盤數都會見到一個情況，就係多次同自己嘅主要銀行申請貸款，但唔批。最終多次都借唔到錢，就搵我哋幫手。

呢種動作有啲似考試，用錯嘅答案答返同一條問題，結果係點其實係可以預計到。如果你公司財政狀況根本冇太大變化，而銀行嘅批核標準亦冇變，結果點會有分別呢？

其實銀行嘅審批方式都比較公式化，並唔係試多幾次就得。同時銀行貸款嘅審批條件又非常封閉，中小企無相關知識，好難知道銀行想睇啲乜。

情況就好似你唔知考試會出咩問題，就估佢想要咩答案，於是喺張白紙度亂咁作答，結果點答都錯。

當然，壞咗嘅鐘一日都會啱兩次，而公司條數每一個月都唔同，隔一排再試一試，或者會有轉機？

但與其再試同一間，不如申請其他銀行，反而結果可能會唔一樣。

嘗試其他銀行是更好的出路

原來好多中小企老闆都唔知，其他銀行即使你從未用過，你一樣可以向佢哋借錢。（人哋唔想做你生意就另計）（唔好處就係會「劃多一下TU（個人信貸記錄)」，評分可能會被降低，又或衰多次）

但總比只重覆申請同一間銀行好，因為你唔會知道唔批係你嘅問題，定係間銀行嘅問題。

有時貸款唔批係關銀行事，例如：

1. 銀行當時壞帳太多，增加咗批核難度、減少貸款額。

2. 銀行審批有特殊條件要滿足，你咁啱過唔到呢個條件。

結果你就白白浪費咗幾個星期甚至幾個月，最後死得不明不白。做生意最傷嘅唔係拎唔到錢，因為唔夠錢都仲可以喺第度搬錢返嚟。而係當你有嘢要搞，萬事俱備，只欠東風，結果東風遲到，甚至無到，殺你一個措手不及。

建議：擴展選擇與尋求專業協助

所以唔熟行情嘅中小企要留意一下，反覆申請並唔係最好嘅策略，只係一種妥協，機會成本要計埋落去。咁倒不如搵其他銀行問一問，叫朋友介紹又好，行去其他銀行又好。或者如果你要精準答案，一次到位，可以搵我哋幫手，做唔到又唔收你錢嘅，有咩所謂？

註：🙇🏻‍♂️以上資訊謹屬個人意見，如有缺失，敬請多多包涵。