政府擔保貸款（八成／九成擔保）申請條件誤會大拆解｜中小企老闆必讀

普遍的申請資格誤解

原來大部份中小企老闆都誤會咗政府擔保貸款申請資格？

每日都有中小企客戶向我哋了解政府九成擔保貸款嘅申請資格，當中經常遇到嘅問題係，中小企老闆由網上資訊所睇到嘅申請資格，同實際真正嘅申請資格完全唔同。

當我哋介紹實際真正嘅申請資格時，客戶就會疑問：「下，政府唔係咁講架喎。」甚至試過有客戶質疑我哋唔識嘢。

網上資訊只講官方基本條件

其實網上可以睇到嘅政府擔保貸款申請資格，主要來自銀行網頁、政府網頁或者一啲貸款比較平台。佢哋嘅資訊係根據「官方」說法嚟寫，亦即係HKMC（香港按證保險公司）訂定嘅最基本條件。因為咁樣寫一定唔會錯，所以大家都係引用同一套官方說法。

但實際上，如果公司只係符合呢啲「最基本條件」，又係咪真係可以申請到貸款呢？其實用邏輯推理就知道，答案係唔得嘅。

根據官方說法，九成擔保申請條件只需要係香港公司，亦唔需要成立滿一年，更無提到有營業額、信貸評級等要求。

如果銀行真係跟足呢個條件去接受申請，咁全香港40幾萬間中小企就100%符合資格，連大量空殼、無營運嘅公司都可以借錢。銀行當然唔會咁做。

銀行嘅隱藏審批條件：真正嘅入場券

由於呢個貸款係由銀行批出，所以公司必須要先通過銀行嘅要求。銀行批完貸款，先會交俾政府批擔保書。換句話說，只要你達到銀行嘅隱藏審批條件，政府個條件咁寬鬆，又點會過唔到呢？

至於銀行嘅條件係點？企喺銀行角度，申請貸款嘅公司至少需要證明以下幾點：

1. 有實際營運及營業額：即代表會有一定營業額（例如最少每年有二百萬營業額，每間銀行要求稍有不同）。唔可以係空殼公司，亦唔可以只係用嚟做副業嘅公司。

2. 已成立一段時間：例如成立咗一年至三年不等，以證明公司有能力喺市場生存。

3. 老闆個人信貸記錄正常：因為銀行唔可能接受不良嘅個人信貸記錄，以免壞賬機會大增。

以上提及嘅只係銀行最基本嘅要求，係最低門檻，要先符合呢啲條件，先有入場券去申請。

成功批核嘅關鍵：仲有好多考慮因素

但實際上，好多公司即使達到以上條件，都未必可以申請成功。因為銀行要保證利潤之餘，亦要保持低壞賬率，所以仲會睇好多因素，包括公司前境、行業狀況、老闆個人資產水平、公司營運狀況等等去批核。

至於要睇幾多因素，就視乎銀行對貸款嘅鬆緊程度，間間唔同。而呢啲係銀行唔會對外說明嘅條件，所以絕大多數申請者都唔會知道。

至於要申請其他種類貸款，甚至乎要同銀行傾利息、爭取更好條件，難度就更加係直線上升。至少要客戶背景條件十分優厚，銀行先至會放鬆少少。

政府九成擔保申請期限將至

政府九成擔保好大機會即將完結，計劃將於2026年3月尾截止。如果中小企想喺計劃完結前完成申請，就要盡快行動。日後計劃完結，就只剩低八成擔保，申請資格可能會更加嚴謹，中小企老闆記得要留意喇。

註：🙇🏻‍♂️以上資訊謹屬個人意見，如有缺失，敬請多多包涵。