【中小企貸款】申請過百分百擔保貸款後，仲可以再借新貸款嗎？

百分百擔保貸款後，仍可申請新貸款？

先講答案，係「有」可能嘅 🙂‍↕️

好多中小企喺早幾年拎咗百分百擔保計劃去頂住盤生意，由於還款期長達十年，大多數公司今日都仲未還晒(除非刻意將還款期縮短)，甚至申請咗還息不還本，即係依家先啱啱開始還本金。

百分百擔保貸款 vs. 一般公司貸款

百分百擔保計劃係一種特殊貸款，唔考慮當事人還款能力，只考慮營運開支嘅貸款，同一般公司貸款非常唔同。

一般公司貸款都會率先考慮借貸人還款能力，有一套計算方法去評估還款能力，只有個案符合風險框架，而銀行又覺得借貸人還得起先會借出貸款。

過度借貸（Over Lending）的風險

中小企呢幾年借落嘅百分百擔保因為申請時唔考慮還款能力，銀行有機會借突咗畀中小企(Over lending)，貸款額大過本身盤生意即使有錢賺都未必夠還款，變相令還款出現困難。喺呢種情況下要借新貸款難度就非常高，因為任何公司貸款都好，銀行會率先考慮你還唔還得起現有嘅貸款，假如銀行覺得你還唔到，就無可能再借出一筆更無可能還嘅新貸款。

若還款能力良好，能否再借？

假如借貸人還得起現有百分百又點呢？佢有新項目想做，需要大筆新資金，再借錢又得唔得？

其實只要當時百分百無「借突」嘅情況，就仲有機會可以借到。但點為之得，或者唔得，唔同銀行就有唔同計法。

假如你係一間每年營業額2000萬嘅餐廳，盈利200萬，借咗900萬嘅百分百擔保，A銀行未必肯借，但B銀行可能覺得可以，不過900萬負債已經係非常多，要說服B銀行再批更多貸款難度都會較高。

如果數字轉一轉，同樣情況但只係借咗400萬百分百擔保，咁AB兩間銀行就可能覺得OK。當然以上只係舉例，實際每間公司營運情況都完全唔同，好難一概而論。

但簡而言之就係『有D銀行易，有D銀行難。唔一定要無負債，但最好唔好太多』

實際案例分析

上年我哋都跟進過好多已經借過百分百擔保而又想借新貸款嘅個案，當中如果真係借得太多嘅話，其實我哋都愛莫能助。可以成功拎到新貸款嘅多數都係Marginal case，即係已經算借得多，但又唔係完全無機會再借嘅公司；通常都係自己問銀行做唔到，再搵我哋幫手。

註：

🙇🏻‍♂️ 以上資訊謹屬個人意見，如有缺失，敬請多多包涵。