唔經唔覺又一過咗一年，MC Advisors 嘅服務已經踏入第4個年頭，今次想同大家分享我哋觀察到嘅2024年中小企市道變化。
2024年中小企市道變化
上年都聽過唔少老闆講，2024年係最難捱嘅一年，呢種講法我哋亦都認同。2023年仲有唔少老闆會因為「開關效應」，希望搵機會去衝一衝，去做中小企貸款開鋪、搞裝修，趁租金平發大嚟做。
不過到咗2024年，我哋見到想衝嘅老闆少咗，可能因為2023年嘅生意冇想像中好，大家對個市都冇以往咁樂觀，唔敢亂搏。(當然，少部份本業生意做得好嘅老闆就仍然睇緊邊度有平租、邊度有機會可以再發大嚟做)
平時我哋都會同中小企老闆了解生意嘅情況，判斷做到貸款嘅機會大唔大，而今年好多時從老闆嘅口中得知生意比2024年差。(而2023亦比2022年較少) 生意下跌亦都代表同銀行借中小企貸款會比以往更加困難，好多時中小企老闆搵我哋傾完、計完數，發覺短期內都好難借到，我哋亦愛莫能助。
中小企銀行貸款變難
其實唔止中小企生意差咗，連銀行嘅批核都難咗，時間亦耐咗。唔少銀行都受壞賬影響，比以往更加謹慎，例如唔接某D行業嘅申請、將貸款額打個折等等，去降低風險。
唔止銀行政策收緊咗，連銀行經理跑數都比以往困難，就算有生意接，都會諗清楚應唔應該接，
一旦有死數(壞賬)，隨時份工都受影響。
有銀行拓展物業抵押貸款市場
雖然今年銀行界嘅風險評估唔同咗，但都唔係全面收緊晒，例如有銀行將貸款上限加大，照顧優質客戶；有銀行拓展埋物業抵押貸款市場，將中小企貸款包埋物業一齊做，平衡風險之餘亦增加放貸。
2025中小企市場展望
早排施政報告公布想放寬貸款年期亦再繼續還息不還本，雖然銀行需要時間去幫手執行，不過見到嚟緊會有呢D措施，可以令中小企貸款市場多少少變化。
2024年對做生意嚟講並唔係友好嘅一年，不過市場會自行調節。能夠生存落去嘅生意，總會迎來好嘅日子。🤝🏻
註：
🙇🏻♂️ 以上資訊謹屬個人意見，如有缺失，敬請多多包涵。
