📲📰新聞節錄: 『商經局指，港府2020年4月推出的中小企「百分百擔保特惠貸款」，截至2024年7月底，共批出66,980宗貸款，涉及1432億元貨款，最新壞帳共6100多宗，涉及貸款擔保額約132億元，累計壞帳率約9.2%……百分百擔保貸款壞帳金額 較去年10月底增76%……於今年初財政預算案公布時，港府消息指百分百特別擔保產品的壞帳率為6.1%』
我哋早半年都有開post提及當時嘅政府擔保計劃壞帳率不斷上升，而且升幅都算犀利，但都估唔到升幅得比想像中快得多。
過去3年總共累積6%，但單喺呢半年就已經額外增加3.1%…
簡單分析下壞帳數字點解會急升
生意差係第一因素，唔洗解釋大家都明。但壞帳率短期內急升，我哋相信同「還息不還本」嘅完結有關。
「還息不還本」機制令好多公司喺拎完百分百之後嘅兩至三年內，都可以完全唔需要還本金，變相有大筆資金兼超低還款額頂住盤生意。
以一間餐廳為例，餐廳一般租金由幾萬至幾十萬不等，另加員工幾位至幾十位，喺百分百擔保嘅計劃框架下，唔少餐廳都好容易拎足$900萬百分百擔保。呢種唔需要計算還款能力嘅貸款會忽視公司嘅經營能力，而借出超乎餐廳可以負擔得到嘅貸款額。
呢$900萬如果分十年還，連本帶利每個月嘅還款額將近十萬。
然而喺「還息不還本」嘅機制下，每月只需要還$2萬幾蚊利息。
所以當呢個機制完結(上年10月起完結，如果10月前申請左最後一期還息不還本，就會喺5月開始還本金)，唔少公司就會立即由每月還2萬幾，變成還10萬。還款額大幅增加上生意唔好，就可能令公司做唔住，從而令呢個本來會爆嘅煲，集中咗喺同一時間爆出嚟。
「還息不還本」並唔係直接導致壞帳嘅原因，呢個機制其實係幫咗中小企拎到兩三年嘅buffer去將盤生意做落去，只係生意實在太差，好多公司如果冇左呢個buffer，根本生存唔到。
換句話講，呢個機制係推遲咗中小企結業嘅時間，將呢個時間由3年前推遲到今日，不過，要嚟嘅始終都要嚟。
原文📲傳送門：
註：
🙇🏻♂️ 以上資訊謹屬個人意見，如有缺失，敬請多多包涵。
