
📲新聞節錄:『一名中介人被揭發涉嫌教唆一名珠寶中小企的經營者及其東主虛報僱員薪酬紀錄,誘使銀行批出兩筆「百分百擔保特惠貸款」共600萬元。3人連同另外兩名同黨昨日被廉政公署落案起訴串謀詐騙及串謀「洗黑錢」…… 』
呢類新聞其實每隔一排就會有,代表政府一直查緊呃百分百擔保貸款嘅人,到而家都未停止過。(亦相信唔會咁快停,咁多人呃咗錢實有排查)MC Advisors今次就分享下以中小企融資顧問公司嘅視角,🤷🏻♂️講下呢啲 騙徒嘅故事。
🧐先講2022-2023年
當時推行緊第四期百分百擔保,亦係最後一期,鑑於前三期百分百計劃有大量假個案、虛報營收、虛報人工租金,政府當時將百分百擔保嘅「把關」責任交咗俾銀行,所以銀行查得好嚴,唔再好似以往咁『亂咁批』。
📑當時需要公司額外提供強積金供款證明、審計報告、租約等去分辨公司真偽,想杜絕虛假個案。
喺呢段時間,我哋不斷收到電話查詢,想知道點樣再申請,要啲咩文件諸如此類。
相信當中大部份都係真正中小企,只係因為公司規模太細,又或者啲伙記住緊公屋,唔方便幫佢供強積金,或者出現金糧等問題,而唔夠料去做申請。
但有時都會收到可疑電話,同我哋講自己有幾間公司,全部都想申請百分百,🤗啲強積金都已經「準備好晒」,啲嘢好齊。
嘩,咁咪好正,資料全部齊晒,擺明送錢俾你賺?
我心諗,既然啲野咁齊,點解唔自己同銀行申請?
👋『Sorry,無興趣。』
其實呢啲一聽就知,係騙徒已經買咗大量假公司,用假人頭供強積金,租一個極平嘅單位,然後搵我哋呢類同銀行合作開嘅顧問公司幫手「出貨」。
有啲仲更加明目張膽,話「合作」順利嘅話,可以介紹多啲「生意」嚟。
🥱真係多謝喎,三唔識七送錢俾我洗,你賺夠想俾啲我賺?
不過又咁講,總會有人為咗十萬八千落搭,幫手做犯法野,但人地就食大茶飯,你就執碎銀。呢啲咁搵笨嘅野我哋真係無興趣。
百分百計劃完咗之後,就少好多呢類電話,因為騙徒手上嘅假公司已經無用武之地。
佢哋當然唔會就咁消失啦,騙子係永遠唔會消失嘅。暫時消失只係因為佢哋需要時間去重新砌過盤假數,去申請其他政府擔保計劃。
所以無幾耐之後,亦出現一啲聲稱自己公司有幾多千萬生意嘅人想借錢,不過一睇文件就穿晒煲,當中亦相信有好多係「人頭」,負責幫後面老闆頂數。
我哋間中「口痕」都會chok下佢哋講多啲,
不過通常佢哋連自己做啲咩生意都講唔出,例如
😈騙子 🙎🏻♂️MC Advisors
😈「我做trading嘅」
🙎🏻♂️『咁你trade 啲乜?』
😈「er...er…電子野囉」
🙎🏻♂️『邊啲電子野?』
😈「電話呀…晶片呀…電子野啦總之」
🙎🏻♂️『你哋一年做幾多生意呀?』
😈「er...er...(諗咗30秒)…大約…我要問下我會計先知喎」
🤭老闆你做自己緊幾多生意你唔知?真係得啖笑。
呢類個案至今我哋間中都會收到,而佢哋都進步咗,會用各種大話想呃埋我哋,不過我哋做咗咁多年,點會分唔到真定假,不過唔踢爆啦,我哋又唔會接嚟做。
又咁講,凡係關錢事嘅野就會有人喺度「搵食」,百分百計劃、TVP、BUD各類funding都畀咗大量機會啲古古惑惑嘅人搵食。
唔好話中介公司丫,各行各業都有害群之馬,輕則走數,重則呃錢,講到尾都係個貪字。
對我哋嚟講,做正當生意又唔係賺唔到錢,點解要做得斜(就算真係賺唔到錢大可以做返銀行,唔需要搵自己嘅人生自由去搏)。
我哋相信好多做生意嘅人,係想搵正當公司幫手,所以我哋唔會教人做數,如果有人問我哋條數點砌我哋都唔會答,凡遇到可疑個案一律踢走。
呢個亦係我哋做咁耐都從未掂過任何一隻假case嘅原因,一來憑經驗就知係真定係假,二來唔想夜晚瞓唔著,三來想生意長做長有而唔係鋌而走險搵快錢。
🫡喺度亦趁機提醒各位老闆,當有人想你做一啲與事實不符嘅野嘅時候,就要打醒十二分精神,出事㗎。
原文網址:涉呃百分百擔保貸600萬元 5人明提堂 | 東方日報 | 要聞港聞https://orientaldaily.on.cc/content/news/odn-20250123-0123_00176_025/
註:
🙇🏻♂️ 以上資訊謹屬個人意見,如有缺失,敬請多多包涵。